Anna Pálína Árnadóttir

Anna Pálína Árnadóttir (1963-2004) var ein dáðasta og vinsælasta vísnasöngkona á Íslandi. Á Anna Pálína minnimynd_medhring stuttum ferli náði hún að skapa sér sérstöðu meðal íslenskra söngkvenna. Efnisskrá hennar var fjölbreytt og spannaði allt frá hefðbundinni norrænni vísnatónlist yfir í íslensk sönglög, þjóðlög, barnatónlist, sálma og djasstónlist. Hún var einnig þjóðþekkt fyrir dagskárgerð sína í útvarpi og árið 2004 kom út bók hennar Ótuktin sem vakti mikla athygli en þar sem hún fjallaði um sambúðina við Kröbbu frænku. Anna Pálína lést úr krabbameini á hátindi ferils síns aðeins 41 árs að aldri. Helstu hljóðritanir: Á einu á máli (ásamt Aðalsteini Ásberg) 1992, Von og vísa (ásamt Gunnari Gunnarssyni) 1994, Fjall og fjara (ásamt Aðalsteini Ásberg) 1996, Berrössuð á tánum (ásamt Aðalsteini Ásberg) 1998, Bláfuglinn 1999, Bullutröll (ásamt Aðalsteini Ásberg) 2000, Guð og gamlar konur 2002, Sagnadans (ásamt Draupner) 2004, Komdu að syngja – DVD (ásamt Gunnari Gunnarssyni) 2006, Anna Pálína – BEZT 2011, Lífinu ég þakka (2 cd) á tónleikum og heimavelli) 2013.

Anna Pálína lauk stúdentsprófi frá Flensborgarskóla í Hafnarfirði 1983 og B.ed. prófi frá Kennaraháskóla Íslands 1988. Hún stundaði ennfremur tónlistarnám við Tónlistarskóla FÍH á árunum1990-1994 og hjá einkakennurum, innlendum sem erlendum. Anna Pálína var kennari við Austurbæjarskóla 1988-1990 og lausráðinn dagskrárgerðarmaður hjá Ríkisútvarpinu frá 1992 til 2004. Hún var afkastamikil á tónlistarsviðinu, hélt tónleika víða innanlands og utan jafnt fyrir börn og fullorðna, kom fram fyrir Íslands hönd á norrænum tónlistarhátíðum og var ötull talsmaður norrænnar vísnatónlistar. Hún sat í stjórn tónlistarfélagsins Vísnavina 1992-1998 og var formaður félagsins 1993-1998. Þá var hún framkvæmdastjóri Norrænna vísnadaga 1994 og 1996. Auk þess rak hún útgáfufyrirtækið Dimmu ásamt eiginmanni sínum frá 1992. Anna Pálína hlaut viðurkenningu Íslandsdeildar IBBY árið 1999 fyrir barnaplötuna Berrössuð á tánum. Einnig hlaut hún starfslaun listamanna árið 2000 og starfslaun Reykjavíkurborgar 2002. Plata hennar Guð og gamlar konur var tilnefnd til Íslensku tónlistarverðlaunanna árið 2003.

GEISLADISKAR: